Улатӑр район администрацине ертсе пынӑ Николай Романов виҫӗмкун ӗҫрен кайнӑ. Район администрацийӗн сайтӗнче ҫырнӑ хыпарта отставкӑна кайма ыйтса пуҫлӑх хӑй кӑмӑлӗпе ҫырнине ӗнентернӗ.
Николай Романов ыйтӑвне пӑхса тухма районти Депутатсен пухӑвӗ кӑрлачӑн 16-мӗшӗнче черетсӗр ларӑва пуҫтарӑннӑ. Пуху иртессине тӑватӑ кун маларах сайтра хыпарланӑччӗ.
Пухӑва Чӑваш Енӗн Элтеперӗн Администрацийӗн Шалти политика управленийӗнчен вырӑнти хӑй тытӑмлӑх енӗпе ӗҫлекен пай пуҫлӑхӗпе Игорь Николаевпа ҫав пайри Анатолий Алексеев консультант та хутшӑннӑ.
Улатӑр район администрацине вӑхӑтлӑха ертсе пыма муниципалитетӑн пуҫлӑхӗн пӗрремӗш ҫумне — йӗркелӳ пайӗн пуҫлӑхне Нина Шпилеваяна шаннӑ. Ҫывӑх вӑхӑтра конкурс ирттерсе район администрацийӗн пуҫлӑхне палӑртӗҫ.
Чӑваш Енӗн культура министрӗ Константин Яковлев Чӑваш Енӗн халӑх художникӗн, живопись тата прикладной ӳнер ӑстин Раиса Терюкалова ӗҫне туяннӑ.
Художник ӗҫӗпе паллашма министрпа пӗрлех культурологи докторӗ, истори ӑслӑлӑхӗсен кандидачӗ, Владимир Васильев профессор тата Чӑваш Е Художниксен пӗрлешӗвӗн ертӳҫи, Чӑваш Енӗн тава тивӗҫлӗ художникӗ Андрей Анохин хутшӑннӑ.
Улатӑр районӗнчи Кувакино ялӗнче ҫуралнӑ, 8-мӗш теҫеткене ҫывхаракан ал ӑстин мастерскойӗнче пулнӑ май министр художникӑн ӗҫ условийӗпе кӑсӑкланнӑ. Ку вӑл ытахальтен мар: ӳнерҫӗн сывлӑхӗ чаплах мар.
Культура министрӗ художника паллӑ кунпа (вӑл 1939 ҫулхи кӑрлачӑн 8-мӗшӗнче ҫуралнӑ) саламланӑ. Константин Яковлевӑн картинӑсен пуххийӗ пуян-мӗн, ҫавӑнпа та вӑл Раиса Терюкалова ӗҫне хаваспах туяннӑ.
Иркутск облаҫӗнче пурӑнакан Алена Юшинӑпа унӑн Улатӑр районӗнчи пиччӗшӗ Валерий Алешев ҫур ӗмӗр иртсен пӗр-пӗринпе тӗл пулнӑ.
Ҫемье пӑтӑрмахӗ ҫур ӗмӗр каялла Иркутск облаҫӗнче пулса иртнӗ. ...Алешевсен ҫемйине Кӑшарнинче йӗкӗреш килет. Анчах вӗсенчен пӗри, вӑл арҫын ача пулнӑ, тӳрех вилет. Хӗрача кӑна сывӑ юлать. Йӗкӗрешсене йывӑррӑн ҫуратнӑ хӗрарӑм, Валерий Алешев амӑшӗ, те кӗҫех куҫне хупать. Хӗрарӑмӑн упӑшки вӑл вӑхӑтра вӑрман хуралҫинче ӗҫленӗ. Тин ҫеҫ ҫут тӗнчене килнӗ хӗр пӗрчӗкне ашшӗ ача ҫуртне вӑхӑтлӑха парать. Кӑштахран, вӑл ӳссен, ӑна каялла илес тенӗ. Анчах ҫулталӑкран арҫын вилет. Тӑлӑха юлнӑ виҫӗ арҫын ачана Патӑрьел районӗнчи тӑван асламӑшӗ (тен, кукамӑшӗ-ши? Телесюжетра бабушка тенӗ) хӑй хӳттине илет. Хӗрачана ача ҫуртӗнчен илсе каяс тенӗ ҫӗре пӗчӗкскере такамсем усрава илсе ӗлкӗрнӗ.
Йӑмӑкне, Аленӑна, пиччӗшӗсем тупма тем пекех ӑнтӑлнӑ. Ҫак ӗмӗтпе Валерий Алешев ҫур ӗмӗр пурӑннӑ. Телекурав урлӑ та шыранӑ, йӑмӑкне шыракан статьясене Иркутск тӑрӑхӗнчи хаҫатсенче те пичетленӗ. Валерийӑн иккӗмӗш сыпӑкри тӑванӗ Зоя Никитина та шырама пулӑшнӑ.
Нумаях пулмасть тӑвансем тӗл пулнӑ.
Паян ирхине Вӑрнар районӗнче 85 ҫулти хӗрарӑм виллине тупнӑ. Вӑл, ахӑртнех, кун пек шартламара шӑнса вилнӗ.
Ватӑ хӗрарӑм виллине ывӑлӗ ферма ҫывӑхӗнче тупнӑ. Кинемей ӑс-тӑн енчен арпашӑнни паллӑ.
Ӗнер, кӑрлачӑн 8-мӗшӗнче, Канаш районӗнче 56 ҫулти арҫын арӑмӗн виллине кил умӗнче тупнӑ. Хӗрарӑм мӑшӑрне ӑҫта каяссине каламасӑр тухса кайнӑ.
Ӗнер Улатӑр районӗнче те 66 ҫулти тата 63-ри арҫынсен виллине тупнӑ. Вӗсем килӗсенчен инҫех мар шӑнса вилнӗ. Иккӗшӗ те эрех ӗҫни паллӑ. Кӑрлачӑн 1-мӗшӗнче Хӗрлӗ Чутай районӗнче 83-ри хӗрарӑм шӑнса пурнӑҫран уйрӑлнӑ. Кӑрлачӑн 2-мӗшӗнче Тӑвай районӗнче 51-ти арҫын пурнӑҫран уйрӑлнӑ. Етӗрне тата Муркаш районӗсенче те пӗрер ҫын шӑнса вилнӗ.
Улатӑр районӗнче вӑй-хал культурипе сывлӑх тата спортпа массӑллӑ ӗҫе чи лайӑх йӗркеленине палӑртма смотр-конкурс ирттернӗ. Иртнӗ ҫулхи ӗҫ кӑтартӑвне тишкерсен вӗренӳ учрежденийӗсенчен Чуварлей (директорӗ — А.Ю. Смирнов, физкультура учителӗ — В.Н. Ванюхин) тата Ахматовӑри (директорӗ — Т.В. Емельянова, физкультура учителӗ — А.Н. Карпов) шкулсем мала тухнӑ. Первомайскинчи шкул та (директорӗ — Г.Н. Белоусова, физкультура учителӗ — Л.Н. Кулюкина) лайӑххипе палӑрнӑ.
Ял тӑрӑхӗсенчен Стемас (ял тӑрӑхне М.С. Душев ертсе пырать) ял тӑрӑхӗ пӗрремӗш вырӑна тухнӑ. Иккӗмӗшпе виҫҫӗмӗшне Чуварлей (Н.В. Климкин) тата Кивӗ Эйпеҫ (В.П. Казанцев) ял тӑрӑхӗсем пайланӑ. Вӗсенче те физкультурӑпа спорт ӗҫне лайӑх йӗркеленӗ.
«Советская Чувашия» хаҫат пӗлтернӗ тӑрӑх, Чӑваш Енре пурӑнакан арҫын хӑйӗн тӑван аппӑшне 50 ҫултан тупнӑ. Кӗркунне вӗҫӗнче вӑл «Жди меня» телекӑларӑмра хӑйӗн шӑпи пирки каласа кӑтартнӑ.
Валерий Алешин икӗ шӑллӗпе, ашшӗпе тата амӑшӗпе Иркутск облаҫӗнче пурӑннӑ. Ашшӗ Патӑрьел районӗнчи Аслӑ Чемен ялӗнчен. Вӑл унта вӑрманпа ӗҫлеме килнӗ те ҫемье ҫавӑрнӑ. Валерий 9 ҫулта чухне ҫемьере йыш хушӑнмалла пулнӑ. Ҫут тӗнчене йӗкӗреш килмелле пулнӑ. Анчах амӑшӗ ача ҫуратнӑ чухне вилнӗ. Тин ҫуралнӑ ывӑлӗ те нумай сывлайман. Пӗчӗк хӗрачана вара, Алена ятлӑскере, ача ҫуртне панӑ.
Ҫулталакран ҫемье пуҫӗн Леонид Алешинӑн та чӗри тапма пӑрахнӑ. Тӑлӑха юлнӑ ачасене кукамӑшӗ Чӑваш Ене илсе килнӗ. Темиҫе ҫул иртсен Аленӑна шыраса тупма шухӑшланӑ.
Аленӑна вӗсем тахҫанах шыранӑ. Халӗ ав тупнӑ. Вӑл кӑрлачӑн 2-мӗшӗнче Канаша ҫитӗ. Валерий ӑна кӗтсе илӗ.
Республикӑри тӑхӑр сусӑра машина уҫҫи тыттарнӑ. Ӑна производствӑри инкеке пула тӗрлӗ вӑхӑтра урасӑр юлнисене панӑ. Машина уҫҫине тивӗҫнисем Шупашкарта, Улатӑр, Патӑрьел, Вӑрнар, Муркаш, Куславкка тата Елчӗк районӗсенче пурӑнаҫҫӗ. Вӗсенчен ҫиччӗшӗ автомобиле иккӗмӗш хутчен илнӗ, мӗншӗн тесен унччен панӑ машинӑн вӑхӑчӗ тухнӑ.
Хальхинче сусӑрсене «Гранта» маркӑллине панӑ. Унӑн эксплуатаци вӑхӑчӗ — 8 ҫул. Социаллӑ страховани фончӗ бензин укҫине тата машинӑна пӗр хутчен тӗплӗн юсанине саплаштарать.
«Lada Granta» лекиччен эпӗ «Окапа» тата «Жигулипе» ҫӳренӗ», — каласа кӑтартнӑ сусӑрсенчен пӗри, сӑмахран. Инвалид кресли багажника вырнаҫнишӗн вӑл уйрӑмах савӑннӑ.
Сусӑрсем валли машина туянма кӑҫал 6,6 миллион тенкӗ уйӑрнӑ.
Улатӑр районӗнчи Октябрьскинчи Культура ҫуртӗнче «Ярмарка семейных талантов» (чӑв. Ҫемье пултарулӑхӗн ярмӑркки) районти IX смотр-конкурс иртнӗ. Ӑна район администрацийӗн культура, наци хушшинчи хутшӑнусен тата архив ӗҫӗн пайӗ йӗркеленӗ.
Конкурса Атрать, Ҫӗнӗ Эйпеҫ, Кивӗ Эйпеҫ, Иваньково-Ленино, Суйкӑн, Алтышево ялӗсенчи, Киря тата Алтышево поселокӗсенчи ҫемье дуэчӗсем хутшӑннӑ. Раҫҫейри Кино ҫулталӑкне халалланӑ ӑмӑртӑва хутшӑннисем малтан вӗсем хамӑр ҫӗршыври фильмсенчи юрӑсене юрланӑ, кайран тӑван чӗлхепе шӑрантарнӑ.
Пӗрремӗш вырӑна Суйкӑнти Юдинсем тухнӑ, иккӗмӗшне – Кивӗ Эйпеҫри Лебедевсем тата Ҫӗнӗ Эйпеҫри Сатривановсем, виҫҫӗмӗшне — Иваньково-Ленинӑри Кирьяновсем. Вӗсене асӑнмалӑх парнепе чысланӑ.
Улатӑрти ЗАГСра ӗҫлекенсем кӑҫалхи вунпӗр уйӑхри демографи лару-тӑрӑвне тишкернӗ. Ача ҫурални ҫинчен ҫак тапхӑрта 452 хутчен ҫырса хунӑ. Асӑннӑ тӗслӗхрен 128-шӗн ашшӗ-амӑшӗ Улатӑр районӗнче пурӑнать. Икӗ, виҫӗ е унтан та ытларах пепке ӳстерекенсем йышланса пыраҫҫӗ.
Ача йышлӑ ҫуратакан ялсенчен Чуварлей палӑрнӑ. Унта 14 тӗпренчӗк ҫут тӗнчене килнӗ. Ҫӗнӗ Энтриел ялӗпе Киря поселокӗнче 15-шер пепке хушӑннӑ. Алтышево ял тӑрӑхӗнче те самай ҫуратаҫҫӗ. Унта кӑҫалхи кӑрлач-чӳк уйӑхӗсенче 11 «ҫӗнӗ кайӑк» килнӗ. Миренки, Суйкӑн ял тӑрӑхӗсенче 10-шар ача ҫуралнӑ, Стемасра — 8, Атратьре – 7, Октябрьскинче – 6. Ытти тӑрӑхра пепке ҫуратакансем сахалтарах пулнӑ. Первомайскинче, тӗслӗрен, пӗтӗмпе те 2 ача кӑна.
Улатӑр тӑрӑхӗнче «Мисс района – 2016» (чӑв. Район мисӗ — 2016) XV конкурс иртнӗ. Раҫҫейри Кино, Чӑваш Енри Ӗҫ ҫыннин ҫулталӑкӗсене халалланӑскере Октябрьскинчи культура ҫуртӗнче ирттернӗ. Илемлӗх ӑмӑртӑвне 16 ҫултан пуҫласа 22 ҫулчченхи хӗрсем 9 ял тӑрӑхӗнчен хутшӑннӑ.
Хӗрсене сцена ҫине епле тухни, пикесем хӑйсемпе паллаштарни тӑрӑх хакланӑ. Пикесен совет фильмӗсенчи ҫемӗсене пӗлнине те кӑтартма тивнӗ. «Девушка — гид» (чӑв. Хӗр — гид) конкурсра пикесем хӑйсен ялӗпе паллаштарнӑ. Пултарулӑх номерӗнче вӗсем юрласа та ташласа кӑтартнӑ.
Район администрацийӗн сайтӗнче конкурс пирки вырнаҫтарнӑ сӑнӳкерчӗксем тӑрӑх хакласан, мисс ятшӑн тупӑшнисенчен пӗри кӑна чӑваш тумӗпе тухнӑ. Вӑл — Кивӗ Эйпеҫри Вера Маруськина.
Район чиперкки ята Миренки ялӗнчи Христина Павелушкинӑна панӑ. Ыттисене тӗрлӗ номинаципе хавхалантарнӑ. Маларах асӑннӑ Вера Маруськина «Ӑслӑ мисс» ята тивӗҫнӗ.
+0.3 °C